ფართო საზოგადოებისათვის ცნობილია, რომ ტელეკომპანია "რეალ ტვ" ცდილობს ოპოზიციური ძალების ერთმანეთში დაპირისპირებას პოლიტიკური ფიგურების მიერ წარსულში ერთმანეთის მისამართით გაკეთებული გამონათქვამების გამოყენებით.
ვფიქრობთ, რომ დესტრუქციული ქმედება, რომელსაც "რეალ ტვ" ახორციელებს, რეაგირების გარეშე არ უნდა დარჩეს. გათიშულობის, ურთიერთწაკიდებისა და შუღლის დათესვის ამ პრიმიტიულ, მაგრამ ბოროტ მცდელობებს ბოლო უნდა მოეღოს.
დესტრუქციული ძალა, რომელიც ოპოზიციური პოლიტიკური ორგანიზაციების გათიშვაზეა ორიენტირებული ასეთივე წარმატებით მოახერხებს სრულიად საქართველოს დაშლასა და დანაწევრებას. ჩვენს ქვეყანას გამაერთიანებლები სჭირდება, ახლა კინკლაობისა და ურთიერთდაპირისპირების დრო არ არის.
ჩვენი პარტია ორიენტირებულია პოზიტივზე, რომელიც საზოგადოების, პოლიტიკური პარტიების კეთილგონიერებაზე დაფუძნებული. საერთო ძალისხმევით ეფექტურად უნდა დავძლიოთ არსებული პრობლემები.
გთხოვთ მოგვაწოდოთ თქვენს ხელთარსებული კოლეგიალობის, კონსტრუქციულობის და ურთიერთპატივისცემის გამომხატველი მასალები, რომელთა საშუალებითაც ერთობლივად უნდა შევქმნათ კეთილმოსურნეობისა და ერთობის დადებითი პრეცენდენტები.
გამოგვეხმაურეთ!
დროებითი მმართველი საბჭო
309319; 996364
-----------------------------------
"დაასახელე შენი კანდიდატი"
ტ: 309 319
მომავლის პარტია იწყებს 2010 წლის ადგილობრივი თვითმმართველობის ორგანოების არჩევნებისათვის მზადებას.
გამოვდივართ ინიციატივით და საზოგადოებას ვთავაზობთ თავად დაასახელოს სავარაუდო კანდიდატები, რომლებიც საქართველოს ქალაქებსა და რაიონულ ცენტრებში მომავლის პარტიის სახელით იყრიან კენჭს.
ეს პოლიტიკური სიახლე მიზნად ისახავს საარჩევნო პროცესებში მოსახლეობის გააქტიურებას. მიგვაჩნია, რომ აუცილებელია მოსახლეობა მაყურებლის პოზიციიდან გადავიდეს აქტიური მონაწილის როლში, დროა მანაც იკისროს პასუხისმგებლობა და მონაწილეობა მიიღოს არა მხოლოდ საპროტესტო გამოსვლებში, არამედ ქვეყნის აღმშენებლობით პროცესებში. ისეთ პატარა ქვეყანას, როგორიც საქართველოა, უფლება არა აქვს უარი თქვას იმ დიდი აღმშენებლობითი პოტენციალის გამოყენებაზე, რომელიც ჩვენს ხალხშია დავანებული. მომავლის პარტია ყველა არსებული რესურსით, გამარჯვების გზაზე, მაქსიმალურად ამოუდგება მხარში ხალხის მიერ დასახელებულ ადამიანებს. კანდიდატები ჩვენთან გაივლიან სპეციალურ მომზადებას, რის შემდეგაც ღირსეულად შეძლებენ წარმოაჩინონ საკუთარი შესაძლებლობები წინასაარჩევნო პერიოდში, რათა შემდგომში გახდნენ თბილისის, ქუთაისის, ფოთის და სხვა რეგიონების საკრებულოს წევრები.
ჯერ-ჯერობით უცნობია 2010 წლის მუნიციპალური არჩევნების ზუსტი თარიღი. გამომდინარე იქიდან, თუ როგორ არასტაბილურ გარემოში გვიწევს ცხოვრება, არც ისაა გამორიცხული, რომ მუნიციპალურ არჩევნებს რაიმე სხვა არჩევნებმა დაასწროს. აღნიშნულის მიუხედავად, მომავლის პარტიას, როგორც პასუხისმგებლურ პოლიტიკურ ძალას, კანდიდატების მომზადება ნებისმიერ შემთხვევაში გარდაუვალ აუცილებლობად მიაჩნია.
პატივი ვცეთ ჩვენს ამომრჩეველს და მათ წინაშე წარვსდგეთ მაღალ დონეზე მომზადებულნი, რეალური სამოქმედო პროგრამებით და განსახორციელებელი პროექტებით! ამასვე მოვუწოდებთ პოლიტიკური სპექტრის სხვა სუბიექტებსაც. ქართულ პოლიტიკაში დაუსაბუთებელი დაპირებების, პოპულიზმის ხანა ერთხელ და სამუდამოდ უნდა დასრულდეს!
თხოვნით მივმართავთ მედია საშუალებებს, დაგვეხმაროს, რათა დაუმახინჯებლად მივიტანოთ საზოგადოებამდე მომავლის პარტიის ეს პოლიტიკური ინიციატივა.
მივმართავთ საზოგადოებას, ნებისმიერ მოქალაქეს, საინიციატივო ჯგუფს:
მოგვაწოდეთ თქვენი რჩეული ადამიანების გვარები და სახელები ტელეფონის ნომერზე 309319.
ნება მოგვეცით შევეხოთ პრაიმერების თემასაც - ჩვენ ვაფიქსირებთ ჩვენს სიმპათიას ამ იდეის მიმართ და არ არის გამორიცხული მომავლის პარტიამ მონაწილეობა მიიღოს პრაიმერებში. საზოგადოებამ კარგად უწყის, რომ 1990-91 წლებში გამართული მრავალპარტიული არჩევნების შემდეგ საქართველოში სამართლიანი არჩევნები აღარ ჩატარებულა. სამხედრო გადატრიალების, ათასგვარი ძალადობისა და გაყალბების შემდეგ კვლავ დიდია ალბათობა იმისა, რომ არჩევნები მომავალშიც გაყალბდეს. ჩვენ კარგად გვახსოვს არცთუ შორეული წარსულის ის სამარცხვინო ტენდენცია, როდესაც ხელისუფლების მიერ შეთავაზებული 20 ლარიანის ფონზე, ოპოზიციის გარკვეული ნაწილი მოსახლეობას მოუწოდებდა თანხა აეღოთ, ხოლო ხმა ოპოზიციისათვის მიეცათ. ამ მახინჯ სტანდარტებს ყველანი ერთად, სამუდამოდ უნდა დავემშვიდობოთ! დაუშვებელია უფლის მიერ მონიჭებული უფლების - ხმის მიცემის პროცესში - ჩაერიოს ძალადობა, ქრთამი, ცრუ დაპირება და ა.შ. ეს ქმედებები, ვისი მხრიდანაც არ უნდა ხორციელდებოდეს ის, უფრო დიდი დანაშაულია, ვიდრე რომელიმე ჩინოვნიკის მიერ ქრთამის აღება. საარჩევნო სუბიქტები ახალი ქცევის კოდექსის მიხედვით უნდა მოქმედებდნენ, ეს კოდექსი მათ უნდა ავალდებულებდეთ პატივისცემით მოეკიდნონ როგორც ერთმანეთს, ასევე ამომრჩეველს.
ღირსეულად ჩატარებული პრაიმერები გულისხმობს ქცევის ახალ კოდექსს, რაც შეიძლება მეტი პოლიტიკური სუბიექტის და მოსახლეობის ფართო ფენების ჩართვას ამ პროცესებში, დებატებს პროექტებისა და პროგრამების ირგვლივ და მიღებული შედეგების ეჭვქვეშ დაყენების მინიმუმამდე დაყვანას, რაც ხელს შეუწყობს მომავალში სამართლიანი არჩევნების ჩატარებას. ბუნებრივია, ყველამ ერთად უნდა ვიზრუნოთ წინასაარჩევნო გარემოს გაუმჯობესების სხვა მექანიზმებზეც, სხვაგვარად შეიძლება არც კი ჰქონდეს რაიმე არჩევნების გამართვას აზრი.
და ბოლოს, მომავლის პარტიის საინფორმაციო სამსახური მოგიწოდებთ კიდევ ერთხელ:
დარეკეთ ტელეფონის ნომერზე 309319 და დაასახელეთ თქვენი კანდიდატები მუნიციპალურ არჩევნებში!
